O galego Eloy Domínguez Serén inaugura mañá a sección oficial de Play-Doc xunto ao mexicano Nicolás Pereda, retrospectiva en 2014, co que lamentablemente non podemos contar este ano. A proxección do filme codirixido con Andrea Bussman, Tales of Two Who Dreamt, será a primeira das da competición internacional, unha cinta que destila realismo máxico con esencia de Toronto.
A emigración de Domínguez Serén a Suecia, as súas vivencias persoais en traballos para sobrevivir e a súas experiencias amorosas e coa lingua, centran o relato do diario filmado No Cow on the Ice. Único filme galego a competición, supón a consagración do autor como unha das estelas ascendentes máis prometedoras do cinema español de non ficción.
Outras seccións que teñen mañá a súa sesión inaugural son Avant-Gutter e Resonancias. O primeiro programa, comisariado pola realizadora afroamericana Akosua Adoma Owusu, fai un percorrido por directores de cor dos últimos 20 anos, nos que por distintos motivos pode sentirse a influencia de Charles Burnett, o noso homenaxeado deste ano. Resonancias é a sección da crítica. Comezará co programa ‘O que nos olla’, selección de curtas de vangarda feita pola investigadora Raquel Schefer, sobre cuestións de identidade.
Continúa o ciclo de Les Blank, co retrato do bluesman Mance Lipscomb. O fillo de Blank, Harrod, contará os detalles máis íntimos desta película na súa presentación.
Andrea Bussman, competicion, eloy dominguez seren, harrod blank, les blank, mance lipscomb, nicolas pereda, no cow on the ice, oficial, resonancias, tales of two who dreamt