J de LOS PLANETAS & IVÁN ZULUETA. PLENA PAUSA
SÁBADO 29 de ABRIL – 23:00h – TEATRO MUNICIPAL DE TUI
J, cantante, guitarra e compositor de Los Planetas, presenta en directo o espectáculo Plena Pausa onde musicaliza pezas seleccionadas do arquivo inédito de Iván Zulueta, o mítico director de Arrebato.
O concerto está inspirado en materiais inéditos, filmados en súper 8 polo cineasta e rescatados pola Filmoteca Española, cos que J crea unha serie de temas musicais que, combinados, constitúen unha obra audiovisual xenuína.
Parte do arquivo estaba sen son e foi aí cando apareceu J para poñer banda sonora a estes traballos, moitos dos cales poderán verse por primeira vez. O resultado converterase no seu primeiro álbum en solitario, un reto creativo para o músico que admite ter moitos puntos en común co cineasta e a súa visión da arte.
Unha banda formada por cinco músicos liderada por J, interpretará as cancións do que será, sen dúbida, un dos proxectos musicais do ano.
