ANDREY GRYAZEV, RECIBIDO CON APLAUSOS EN PLAY-DOC
O cineasta presentou O día do mineiro, segunda parte de Sanya e Pardal, que gañara o ano pasado o principal premio do festival.
Mañá segue a competición con Songs From the Nickel e The D Train. Tachenko presenta o seu último álbum en directo.
Tui. 31 de marzo de 2011. O Festival Internacional de Documentais Play-Doc acolleu hoxe a presentación do filme O día do mineiro de Andrey Gryazev. O cineasta, gañador o pasado ano con Sanya e Pardal, dixo estar "expectante por ver a reacción do público ás dúas películas" e comentou que co filme quería reflexionar sobre "como é posible que tendo cartos e status social e por causas alleas a un acabemos caendo no máis baixo da escala social e seguir mantendo a nosa humanidade". A cinta conta o día a día dun mineiro con dificultades económicas e a relación coa súa familia dun xeito veraz e próximo aos personaxes. "Eu completo o baleiro da súa personalidade, completo a súa alma, por iso poden confiar tanto en min", reflexionaba Gryazev sobre o seu método.

A terceira xornada do festival mostrará os filmes a competición The D Train e Songs From the Nickel. A primeira é un poema visual sobre a fugacidade da vida da man dun dos cineastas norteamericanos independentes máis importantes da década, Jay Rosenblatt. O segundo filme vén asinado pola nova realizadora Alina Skrzeszewska e céntrase nun barrio marxinal de Los Angeles. A súa depurada técnica observacional valeulle ser seleccionada en multitude de festivais internacionais.

Completan o día Tachenko e David López, un dos máximos responsables do selo de música independente Limbo Starr, que presentará un filme sobre os dez anos que a empresa madrileña leva traballando no noso país, producindo a artistas tan relevantes para a nosa industria como Nacho Vegas. O grupo zaragozano tocará os temas do seu último disco, Os reís porque sois jóvenes, na Sala Metropol ás 00.30. As entradas pódense retirar na billeteira por dez euros.


Máis información en www.play-doc.com.

CONTACTO:
prensa@play-doc.com
tlf. 686876029